Јанар айдыҥ 23-чи кӱнинде Горно-Алтайсктагы Эл драма театрдыҥ Кичӱ залында кичинек болчомдорго учурлап белетелген алтай мультфильмдердиҥ кӧргӱзӱ-презентация ӧтти. Алтай Республиканын культура аайынча министриниҥ ордынчызы А.В.Марлужоков  залда јуулгандарды уткып, сӧс айтты.  Алтай мультфильмдерди  «Эл Алтай» ГТРК ла ады-јарлу балдардыҥ бичиичизи Кӱлер Тепуков баштап тургускандар. Бу мультфильмдердиҥ геройлорын П.В. Кучияктын адыла адалган Эл драма театрдыҥ актерлоры ӱнделткен. 

«Азатпай» деп студия тургускан «Тоолорло таныжалы» ла «Ӧҥдӧр» деп мультфильдер кичинек балдарга тазыктырынарына јӧмӧлтӧ болот. Мында балдар алтай тилле он тоого јетире тоолоп ӱренедилер ле јӱзӱн-башка ӧҥдӧрлӧ таныжадылар.

Ондор тоолу јылдар туркунына биске кару болуп калган орус мультфильмдер «Мамонтенокко эне» (Мама для мамонтенка), «Јарбыныш» (Обида), «Учурал» (Однажды утром), «Ӱчӱ Простаквашинодоҥ» (Трое из Простоквашино), «Тӱш јеринде» (Сон), «Кыйамат чычканак» (Привередливая Мышка) Алтай Республиканын Јааны, Алтай Республиканын Башкарузынын Председатели А.В. Бердниковтыҥ јакылтазыла, ВГТРК-ныҥ јааныныҥ ордынчызы Р.А. Сабитовтыҥ јӧмӧлтӧзиле тургузылган.